VI Ислом бирдамлиги ўйинлари. Медалларимиз 93 тага етди. Эрон билан "тилла" тафовути 4 тани ташкил қилмоқда (Тўлиқ жадвал)

Ўтган куни 4 та медаль билан чекланган эдик. Кеча 3 та олтин, 4 та кумуш, 4 та бронза медалини расмийлаштирдик. Бу билан умумий медалларимиз сони 93 тага етди - 29 та олтин, 34 та кумуш, 30 та бронза. Медаллар жамғариш бўйича Туркия терма жамоаси ҳамон жуда катта фарқ билан пешқадамлик қилмоқда. Турк қардошларимиз 71 та олтин, 44 та кумуш, 35 та бронза, жами 150 та медаль қўлга киритиб улгуришди. Кечаги баҳсларда улар худди бир кун олдинги сингари 10 та медалга эга чиқишди.   

Иккинчи ўрин учун кураш Ўзбекистон ва Эрон спорт делегациялари орасида давом этмоқда. Кечаги кун якуни бўйича Эрон билан ўртадаги олтин медаллар тафовути 4 тани ташкил қилмоқда. Биз форсларга қараганда 4 та олтин, 15 та кумуш кўп жамғарганмиз. Бронза медалларимиз сони тенг - 30 тадан!

Мезбонлар Саудия Арабистони терма жамоаси 7-поғонадан 4-ўринга кўтарилиб олди. Саудлар ҳисобида 18 та олтин, 10 та кумуш, 26 та бронза, жами 54 та медаль бор. Миср, Баҳрайн, Қозоғистон, Нигерия, Марокаш ва Озарбайжон терма жамоалари Топ-10`таликдан жой олган. 

Қирғиз Республикаси терма жамоаси учун кечаги кун омадли келди. Қўшниларимиз биз сингари кеча 3 та олтин, 4 та бронза медали қўлга киритишди. Улар 20-поғонадан 13-ўринга кўтарилиб олишди.  

Марказий Осиё давлатларининг медаллар жамғариш бўйича ўрни: 

2. Ўзбекистон — 29 та олтин, 34 та кумуш, 30 та бронза

7. Қозоғистон — 14 та олтин, 16 та кумуш, 20 та бронза

13. Қирғиз Республикаси — 4 та олтин, 4 та кумуш, 10 та бронза

26. Афғонистон — 1 та олтин, 1 та кумуш, 1 та бронза

28. Тожикистон — 3 та кумуш, 3 та бронза

Туркманистон ҳали медаль олмаган.