ВИДЕО. Маҳмуд Мурадов Чехиядаги машғулотларидан видео жойлади

Ўрта вазнда ўзбекистонлик UFC жангчиси, 32 ёшли Маҳмуд Мурадов (25-8) Инстаграмдаги саҳифасига машғулотларидан видео жойлади. Мурадов айни дамда Чехияда бўлиб турибди.

"Муваффақият сири, гарчи умуман сир бўлмаса ҳам, қилаётган ишингизга бўлган муҳаббат, мотивация, энергия ва тартиб-интизомдадир.

Буларнинг барчаси доимо ғалаба қозониш имконини беради. Меҳнат, интилувчанлик ва ғалаба қозониш истаги шунчаки спортчини чемпиондан ажратиб туради", - дея мазкур видеони изоҳлаган ҳамюртимиз.

Маҳмуд Мурадов UFC'да ҳозиргача бешта жанг ўтказиб, уларнинг учтасида ғалаба қозонган, иккита жангда мағлуб бўлган. Мурадов сўнгги бор 22 октябрь куни Абу-Дабида ўтказилган UFC 280 мусобақаси доирасида бразилиялик Кайо Борральо (13-1)га қарши октагонга кўтарилиб, очколар ҳисобига мағлуб бўлган эди. Маҳмуд навбатаги жанги 2023 йилнинг январь ёки февраль ойида бўлиб ўтишини маълум қилган эди.