Влахович фаолиятини Ла Лигада давом эттириши мумкин

Манбага кўра, 26 ёшли сербиялик ҳужумчи "Атлетико"га воситачи томонидан эркин агент сифатида таклиф қилинган. Унинг Италия клуби билан шартномаси 2026 йилнинг ёзигача амал қилади.

Хабар қилинишича, Влаховичнинг "Ювентус" билан янги битим бўйича музокаралари тўхтаб қолган: сербиялик футболчи мавсум учун 8 миллион евро талаб қилмоқда, клуб эса кўпи билан 6 миллион евро бермоқчи. Унинг амалдаги шартномасига кўра, футболчи йилига тахминан 12 миллион евро маош олади.

Унга "Атлетико"дан ташқари "Милан", "Бавария", "Барселона" ва "Арсенал" қизиқмоқда. Влахович 2022 йилдан бери туринликлар сафида ўйнаб келмоқда. У 2025/26-йилги мавсум барча мусобақаларда 21 ўйинда майдонга тушиб, 8 та тўп киритди ва 2 та голга ассистентлик қилди. Transfermarkt унинг бозордаги нархини 35 миллион еврога баҳоламоқда.