Воҳада энг кучли картингчилар аниқланди + ФОТО

Бунинг баробарида, ёшларни жисмонан ва маънан соғлом руҳда тарбиялашга жиддий эътибор қаратилаётир.

Шубҳасиз, Урганч туманидаги ўқув-машқ майдонида спортнинг картинг тури бўйича ўсмирлар ўртасида ўтказилган Хоразм вилояти чемпионати ҳам ана шу эзгу ишларнинг ушалишига хизмат қилади.

Ўзбекистон Республикаси мудофаасига кўмаклашувчи “Ватанпарвар” ташкилоти Хоразм вилояти кенгаши ҳамда вилоят техник ва амалий спорт турлари маркази (ВТАСТ) томонидан уюштирилган мазкур мусобақада воҳанинг саккизта жамоасининг 7 ёшдан 18 ёшгача бўлган иқтидорли картингчилари ғолиблик учун стартга чиқишди.

Якуний натижаларга кўра, двигатель сиғими 50 сантиметр куб бўлган картинг биринчилигида Хива тумани ўқув спорт техника клуби (ЎСТК) аъзоси Дониёрбек Рўзметов мусобақада илк марта иштирок этишига қарамай, Хоразм вилояти чемпиони номига сазовор бўлди. Чемпионатда қатнашган ягона қиз, ўн уч ёшли Ангел Луценко ҳам маҳоратли картингчи эканлигини яна бир бор исботлаб берди.