Воҳиддин Нажмиддинов жаҳон чемпионати совриндори, Ўзбекистон умумжамоа ҳисобида иккинчи бўлди + ФОТО

Ёшлар, катталар ва фахрийлар ўртасида ташкил этилган жаҳон чемпионатида Воҳиддин Нажмиддинов бошчилигидаги Ўзбекистон терма жамоаси ҳам муносиб тарзда иштирок этди.  

Хабар берганимиздек, ёшлар ўртасидаги мусобақада Жавоҳир Қурбонов профессионал йўналишда олтин медалга сазовор бўлди. У 24 килолик тошни 10 дақиқа ичида даст кўтариш машқида 170 марта, силтаб кўтаришда 93 бор, иккикурашда 263 маротаба кўтаришга муваффақ бўлди. 

Шунингдек, Жавоҳир узун циклда кумуш медални қўлга киритди. -68 кг вазн тоифасида Асадбек Ўзгамов узун циклда энг яхши натижа кўрсатди ва олтин медаль билан тақдирланди. Иккикурашда эса Ўзгамов бронза медалига сазовор бўлди.

Шу тариқа баҳодирлар ўйинлари ва тош кўтариш бўйича ёшлар ўртасидаги жаҳон чемпионатида Ўзбекистон терма жамоаси умумжамоа ҳисобида 90 балл билан 2-ўринни қўлга киритди. Норасмий умумжамоа ҳисобида мусобақа мезбони – Россия терма жамоаси 110 балл билан 1-ўринга сазовор бўлди. Кучли учликни 70 балл билан Латвия терма жамоаси якунлаб берди.

Жаҳон чемпионатининг сўнгги куни фахрийлар супачага чиқишди. -68 кг вазнда юртимиз шарафини ҳимоя қилган Воҳиддин Нажмиддинов икки курашда 24 килограмлик тошни 63  маротаба кўтариб, бронза медалига сазовор бўлди. Терма жамоамиз делегацияси эртага соат 08:30да Тошкентга қайтиб келади.