Волейбол. Андижон вилояти жамоаси Ўзбекистон кубоги соҳиби + ФОТОГАЛЕРЕЯ

Мазкур мамлакат кубоги баҳсларида Қорақалпоғистон Республикаси, Тошкент шаҳри барча вилоятлардан 14 та жамоа чемпионлик йўлида кураш олиб борди. Мусобақанинг финал босқичига Қашқадарё, Андижон, Сирдарё ва Тошкент вилояти жамоалари етиб келишди. 

Финал чиптаси учун бўлган беллашувларда Тошкент вилояти спортчилари Сирдарё жамоасини мағлуб этиб, финалга йўл олган бўлса, андижонлик волейболчилар Қашқадарё жамоасидан устун келишди. Учинчи ўрин учун кечган учрашувда Қашқадарё вилоятининг асосан Кўкдала туманидан ташкил топган жамоаси сирдарёлик тенгқурларини 2:0 ҳисоби билан ортда қолдириб, учинчи ўринни қўлга киритишди.

Финалда ўзаро тўқнаш келган Андижон ва Тошкент вилояти жамоалари ўртасидаги ўйин шиддатли ва кескин қарама-қаршиликка бой бўлди. Якунда андижонлик ёш волейболчилар 2:1 ҳисоби билан зафар қучиб, Ўзбекистон кубоги соҳибларига айланишди. Мезбонлардан иборат жамоа кумуш медалларга эга чиқди. 

Мусобақа якунлангач, тантанали тақдирлаш маросими ташкил этилди. Унда иштирок этган Тошкент вилояти спорт бошқармаси бошлиғи Рустам Бобоқулов, Ўзбекистон волейбол федерацияси раиси ўринбосари Жамшид Файзиев, ЎзДЖТСУ биринчи проректори Шерзод Мирзанов, Тошкент вилояти волейбол федерацияси ижрочи директори Даврон Халиковлар ғолиб ва совриндор жамоаларга диплом, медаль, кубок ва қимматбаҳо эсдалик совғаларини топширишди.

Таъкидлаш жоиз, ғолиб жамоа энди жорий йилда Россиянинг Новосибирск шаҳрида ўтказиладиган Ҳамдўстлик кубогида мамлакатимиз шарафини ҳимоя қилади.

Илҳом РАҲМОНОВ тайёрлади