Волейбол бўйича ўсмирлар ўртасида Марказий Осиё чемпионати якунланди

Мусобақанинг қизлар ўртасидаги финал беллашувида ҳамюртларимиз қозоғистонлик тенгқурларига қарши баҳс олиб боришди. Қизиқарли кечган ўйин қўшниларимизнинг 3:0 ҳисобидаги ғалабаси билан якунланди. 

Шу тариқа, қизлар ўртасидаги беллашувларда Қозоғистон жамоаси биринчи ўринни қўлга киритди. Иккинчи ўрин Ўзбекистон-1 жамоасига насиб этган бўлса, ярим финалда имкониятни бой берган Ўзбекистон-2 қизлари бронза медаллари билан тақдирланишди.

Йигитлар ўртасидаги финалда Покистонни 3:2 ҳисобида доғда қолдирган Эрон чемпионликни тантана қилди. Бўлажак чемпионларга ярим финалда имкониятни бой берган йигитларимизга бронза медаллари топширилди.

Тошкентда волейбол мусобақалари давом этади. Энди 22-29 июль кунлари пойтахтимиз 16 ёшгача бўлган ўсмирлар ўртасидаги Осиё чемпионатига мезбонлик қилади.