Волейбол: Самарқандда Ўзбекистон кубоги бўлиб ўтмоқда

Мазкур мусобақанинг тантанали очилиш маросимида Республика волейбол федерацияси ижрочи директори Ф.Алимов, Самарқанд вилояти ҳокими ўринбосари Р.Қобилов ушбу спорт турининг янада оммалашаётгани ва кучли жамоалар сафи кенгайотганини таъкидлаб ўтишди. Шунингдек, бу галги мусобақада илк бор республикамизнинг 13 та вилоятининг жамоалари майдонда ўз маҳоратларини синовдан ўтказаётганини эътироф этиб ўтишди.

Ўзбекистон кубогида жамоалар 4 гуруҳга бўлинган ҳолда баҳсга киришди. “А” гуруҳидаги баҳсларда Бухоро вилоятининг “Бухоро” жамоаси Жиззах давлат педагогика институтининг “ЖизДПИ” жамоаси устидан 3:1 ҳисобида ғалаба қозонди. Шунингдек, жиззахликлар ушбу гуруҳда ўйин олиб бориб, Тошкент шаҳрининг “Ориент” жамоасига ҳам ютқазиб қўйди.

“В” гуруҳида ўйнаган “Андижон” жамоаси “Навоий олимп” жамоасига 0:3 ҳисобида мағлуб бўлди. “С” гуруҳида беллашган Самарқанднинг “Алоқа” жамоаси волейболчилари “Сирдарё” жамоасини 3:0 ҳисобида енгди. “D” гуруҳида яна бир самарқандликларнинг “СамДУ” жамоаси Фарғона давлат университетининг “Ёшлик” жамоасини 3:2 ҳисобида мағлуб этди. Фарғона вилоятининг “Қўқон” жамоаси эса Навоий вилоятининг “Суғдийона” жамоасига ютқазди.

Эслатиб ўтамиз, мазкур мусобақа 17 ноябрга қадар давом этади. Якунда турнир ғолиб ва совриндорлари ташкилотчилар томонидан кубок, диплом ва эсдалик совғалари билан тақдирланишади.