WBA рейтинги. Мадримов биринчи ўринга кўтарилиб олди

Унга кўра, рейтингдан олти нафар ўзбекистонлик боксчи ўрин олган. 

Эълон қилинган рейтингда Муроджон Аҳмадалиев иккинчи енгил вазн тоифасида (-55,3 кг) чемпион сифатида қайд этилган. Аҳмадалиев шунингдек IBF йўналиши чемпиони ҳам ҳисобланади. 

Биринчи ярим ўрта вазн тоифасида (-63,5 кг) жангларини олиб бораётган икки боксчимиз аввалги ойдаги каби ўринларида қолишган. Шаҳрам Ғиёсов олти, Шоҳжаҳон Эргашев эса еттинчи поғонани эгаллаб турибди. 

Биринчи ўрта вазн (-69,85 кг) тоифасида Исроил Мадримов август ойида Эрик Уолкер устидан қозонган ғалабасидан сўнг биринчи ўринга кўтарилиб олди.

Иккинчи ўрта вазн тоифасидаги боксчимиз Бектемир Мелиқўзиев (-76,2 кг) эса 15-ўриндан 14-ўринга кўтарилди. У айни пайтда WBA Continental Americas камари соҳиби бўлиб турибди.  

Яримоғир вазн тоифасида (-79,3 кг) Рустам Тўлаганов ҳам аввалги ойдагидан 1 поғона юқорилади ва 14-ўринга жойлашди.