“Women’s Chess Championship 2025” якунланди. Шахматчиларимиз совринли ўринларни банд этишдими?

Мусобақада дунёнинг 14 давлатидан келган 150 нафарга яқин аёл шахматчи икки гуруҳда бош соврин учун баҳс олиб борди. Сўнгги 9-тур учрашувларида ғолиб ва совриндорлар аниқланди. "А" гуруҳида бош соврин польшалик Алисия Сливискага насиб этди. У 9-турда қора доналарда ўйнашига қарамай, россиялик Анастасия Бондарукни мағлубиятга учратди. Тўққиз имкониятдан 7,5 очко жамғарган Алисия “Women’s Chess Championship 2025” чемпионига айланди. Ватандоши Полина Шувалова билан дуранг ўйнаган россиялик Анна Шухман 7 очко билан иккинчи ўринни эгаллади. 

Уч нафар шахматчи - Полина Шувалова, Лея Гарифуллина ва ҳамюртимиз Умида Омонова 6,5 тадан очко тўплади. Фақат қўшимча кўрсаткичларга кўра Шувалова совринли учинчи ўринга эга чиқди. Омонова 5-ўринни банд этди. У сўнгги турда яна бир шахматчимиз Гулдона Каримовадан устун келганди.      

Ёшлар ўртасида икки карра жаҳон чемпиони Афруза Ҳамдамова 9-турда яна бир вакиламиз Маржона Маликовани таслим этди. Нилуфар Якуббоева қора доналарда россиялик Варвара Польякова билан муросага келди. Беш яримтадан очко жамғарган Гулдона Каримова 11, Афруза Ҳамдамова 12, Нилуфар Якуббоева 16-ўрин билан кифояланди.     

Эътиборлиси, мусобақанинг "B" гуруҳида совринли ўринларнинг бари ўзбекистонлик шахматчиларга насиб этди. Мафтуна Маматқулова 9 имкониятдан 8 очко тўплаб, ушбу гуруҳ ғолибасига айланди. Робияхон Сардорова 7,5 очко билан иккинчи ўринни эгаллаган бўлса, 7 очкога эга Шоҳина Аҳмедова кучли учликка якун ясаб берди.