World Athletics спортчиларни қўллаб-қувватлаш жамғармасини таъсис этди

Халқаро енгил атлетика федерациялари ассоциацияси (World Athletics) коронавирус пандемияси сабабли молиявий инқироз шароитларида спортчиларни қўллаб-қувватлаш мақсадида 500 минг доллар миқдорида жамғарма таъсис этганлигини эълон қилди.

“Жамғарма орқали халқаро мусобақалар бекор қилиниши туфайли даромадларининг салмоқли қисмини йўқотган енгил атлетикачи спортчиларга икки йил давомида ёрдам кўрсатилади”, – деди ташкилот раҳбари Себастьян Коэ.

Жамғарма учун маблағни унинг фахрий раиси бўлган Монако князи Альбер II ажратди. Жамғармадан ёрдам пули олиш учун спортчи минтақалараро эксперт гуруҳига кўриб чиқиш учун тегишли буюртма бериши керак.

“Шу йил охиригача бирорта мусобақа ўтказишга умид қилмоқдамиз. Шунга қарамасдан иложи борича кўпроқ спортчиларга ёрдам кўрсатишга ҳаракат қиламиз”, – деди Себастьян Коэ.

Илгари Европа енгил атлетика федерацияси коронавирус пандемияси сабабли Европа чемпионатини бекор қилинганини айтиб ўтган. Бу мусобақа 26-30 августда Париждаги “Шарлетти” стадионида ўтказилиши мўлжалланган эди. Эслатиб ўтамиз, ташкилот Токио Олимпиадасининг сурилиши сабаб 2021 йилга мўлжалланган жаҳон чемпионатини 2022 йилга кўчиргани ҳақида расмий маълумот берган.