World Boxing Кубоги. Гап сонда эмас, сифатда! Тўрт боксчимиздан уч нафари шоҳсупада!

Ушбу нуфузли мусобақада жаҳоннинг 49 давлатидан келган 400 нафар боксчи медаллар йўлида рингга кўтарилди. Юртимиз шарафини Элшод Расулов мураббийлигидаги Ўзбекистон терма жамоасининг тўрт нафар боксчиси ҳимоя қилди. Улардан биргина -51 кг вазндаги боксчимиз Феруза Казакова германиялик Макси Клозега имкониятни бой бериб, турнирни медалсиз якунлади. 

Қолган уч боксчимиз Бразилиядан медаль билан қайтадиган бўлди. -48 кг вазн тоифасидаги вакиламиз Фарзона Фозилова ҳал қилувчи финал жангида мексикалик Фатима Эррерани 4:1 ҳисобида мағлубиятга учратиб, дастлабки олтин медални терма жамоамизга тақдим этди. 

Ўзбекистоннинг 2025 йилдаги энг яхши аёл спортчиси Навбаҳор Ҳамидова эса финал жангида қозоғистонлик икки карра жаҳон чемпиони Аида Абикеевани 5:0 ҳисобида таслим этди. Бу билан Ҳамидова ўтган йили Ливерпулдаги Жаҳон чемпионати финалидаги мағлубият учун қозоғистонлик рақибасидан муносиб реванш олди. Навбаҳор World Boxing Кубогининг икки карра ғолибасига айланди.  

Оғир вазндаги чарм қўлқоп устамиз Жаҳонгир Зокиров World Boxing Кубогида бронза медалига сазовор бўлди. Ҳакамлар 1/2 финалда арманистонлик тажрибали рақиб Давид Чалоянга 3:2 ҳисобидаги ғалабани тақдим этишганди. 

Шу тариқа, Ўзбекистон терма жамоаси 2 та олтин, 1 та бронза медали билан умумжамоа ҳисобида олтинчи ўринда якунлади. Тўрт нафар боксчи билан қатнашган давлат терма жамоаси учун бу жуда ҳам яхши натижа. Бразилия 4 та олтин, 5 та кумуш медаль билан биринчи ўринни банд этди.