World Boxing Кубоги. Зокиров ва Ҳамидова кейинги босқичда

Ушбу нуфузли мусобақада Элшод Расулов мураббийлигидаги Ўзбекистон терма жамоасининг тўрт нафар боксчиси ҳимоя қилаётганди. Улардан -51 кг вазнда юртимиз шарафини ҳимоя қилган Феруза Казакова германиялик Макси Клозега 0:5 ҳисобида имкониятни бой бериб қўйди. 

Қолган боксчиларимиз чемпионлик сари юришларини давом эттиришяпти. -48 кг вазн тоифасидаги боксчимиз Фарзона Фозилова иккинчи босқичда марокашлик Виссал Фаҳирни 4:1, Ўзбекистоннинг 2025 йилдаги энг яхши аёл спортчиси Навбаҳор Ҳамидова швейцариялик Анна Женнини 4:1, оғир вазндаги чарм қўлқоп устамиз Жаҳонгир Зокиров руминиялик Флорин Ионитани 5:0 ҳисобида мағлуб этган эди. 

Бугун -65 кг вазндаги вакиламиз Навбаҳор Ҳамидова бразилиялик Беатриз Гомесга қарши баҳс олиб борди ва мезбон боксчини ҳакамларнинг якдил қарори эвазига 5:0 ҳисобида мағлубиятга учратди. Баҳодир Жалоловнинг издоши сифатида қаралаётган Жаҳонгир Зокиров учинчи босқичда болгариялик Йордан Морежондан 5:0 ҳисобида устун келди.