World Boxing Кубогида икки ғалаба ва бир мағлубият

Ушбу нуфузли мусобақада Элшод Расулов мураббийлигидаги Ўзбекистон терма жамоасининг тўрт нафар боксчиси ҳимоя қилаётганди. Улардан бири мағлубиятга учраб, мусобақадаги иштирокини эрта якунлади. -51 кг вазнда юртимиз шарафини ҳимоя қилган Феруза Казакова германиялик Макси Клозега 0:5 ҳисобида имкониятни бой бериб қўйди. Рефери Казаковани таъқиқланган ҳаракатлар қилган деб топиб, ундан 2 очко олиб ташлади. Бу эса мағлубиятга сабаб бўлди. Боксчилар “Странджа” турнирида ҳам ўзаро тўқнаш келишган ва ўшанда Феруза 4:1 ҳисобида ғалаба қозонган эди.

Қолган иккинчи вакиламиз эса Жаҳон Кубогидаги юришини ғалаба билан бошлади. -48 кг вазн тоифасидаги боксчимиз Фарзона Фозилова марокашлик Виссал Фаҳирни 4:1, Ўзбекистоннинг 2025 йилдаги энг яхши аёл спортчиси Навбаҳор Ҳамидова швейцариялик Анна Женнини 4:1 ҳисобида таслим этди. 

Бир кун аввал оғир вазн тоифасидаги чарм қўлқоп устамиз, Баҳодир Жалоловнинг издоши сифатида эътироф этилаётган Жаҳонгир Зокиров руминиялик Флорин Ионитани ҳакамларнинг якдил қарори билан 5:0 ҳисобида мағлуб этган эди.