WR Chess Masters. Абдусатторовдан камбэк, 1/4 финалда ўзбек дербисини кўрмаймиз

Мукофот жамғармаси 58 000 еврони ташкил қилувчи WR Chess Masters турнирида дунёнинг кучли 16 нафар гроссмейстери бош соврин учун баҳсларга киришди. Улар орасида ёш гроссмейстерларимиз Нодирбек Абдусатторов ва Жавоҳир Синдаровнинг ҳам борлиги ҳақида хабар берган эдик.

Афсуски, Жавоҳир Синдаров илк даврада франциялик Максим Вашье-Лагравга имкониятни бой бериб қўйди. Асосий икки партияда томонлар муросага келишди. Ғолиб номини аниқлаб берган армагеддон партиясида эса француз шахматчисининг қўли баланд келди. 

Нодирбек Абдусатторов эса турнирдаги ягона аёл шахматчи, Швейцария шарафини ҳимоя қилаётган 12-Жаҳон чемпиони Александра Костенюкка қарши баҳс олиб борди. Биринчи партияда Нодирбек катта устунликка эга бўлса-да, якунда ютқазиб қўйди. Иккинчи партияда у хатосини тўғрилади ва ғалабага эришди. Бу жуфтликда ҳам ғолиб номини қўшимча армагеддон партияси аниқлаб берди. Унда қора доналарда дуранг қайд этгани учун Абдусатторов 1/4 финалга чиқди. 

Эътиборлиси, агар Жавоҳир Синдаров ҳам ғалаба қозонганида, биз мусобақанинг 1/4 финал босқичида ўзбек дербисига гувоҳ бўлар эдик. Бугун Нодирбек чорак финалда Жавоҳир учун ҳам реванш олишга уриниб кўради.