WTA Ningbo Open. Камилла Раҳимова ҳам асосий тўрга йўл олди

Полина Кудерметовадан кейин Камилла Раҳимова ҳам асосий тўр йўлланмасини қўлга киритди. Ўзбекистоннинг биринчи ракеткаси саралашнинг финал учрашувида россиялик Татьяна Прозоровани қийинчилик билан мағлубиятга учратди. 

Уч соату 52 дақиқа давом этган мураккаб баҳсда саралаш турнирида саккизинчи рақам остида таснифланган вакиламиз 7/6(4), 4/6, 6/4 ҳисобида ғалаба қозонди. Камилла 3 та эйс (рақибасида - 0) зарбасини амалга ошириб, 8 та қўшхатога (рақибасида - 3) йўл қўйди. Бу теннисчиларнинг ўзаро ўтказган иккинчи учрашуви бўлди - 2:0. Икки йил олдин ўтган илк баҳсда ҳам Раҳимова Прозоровадан устун келган эди.

Таққослаш учун, Камилла айни пайтда WTA рейтингида 69, Татьяна эса 120-ўринни эгаллаб турибди. Бугун Раҳимова асосий тўрнинг илк давра учрашувида дунёнинг 28-ракеткаси чехиялик Мария Боузковага қарши кортга чиқади. Ушбу баҳс бизнинг вақт билан соат 14:30да бошланади.