Хабарингиз борми? Равшан Эрматов АҚШДа ЖЧдаги ёрдамчилари билан "Мустақиллик Кубоги" финалида ҳакамлик қилди + ФОТО

Икки кун давомида 10 та штатдан жами 12 та жамоа бош соврин учун кураш олиб борди. Гуруҳ босқичи ҳамда 1/4 финални муваффақиятли ўтказган "Uz Galaxy" (Калифорния штати), "Vodiy Hamkor" (Огайо штати), "Lokomotiv" (Нью-Йорк штати) ҳамда UZB FC (Нью-Жерси штати) жамоалари ярим финалга етиб келишди. 

Ҳал қилувчи финал учрашувида Нью-Жерси штатининг UZB FC жамоаси Калифорния штатининг "Uz Galaxy" клубини 2:1 ҳисобида енгиб, "Мустақиллик Кубоги" соҳибига айланди. Бу жамоа ушбу кубокни иккинчи бор қўлга киритди. Vodiy Hamkor клубидан 1:0 ҳисобида устун келган "Lokomotiv" жамоаси бронза медалга эга чиқди. 

Эътиборга молик жиҳати, финал баҳсини Жаҳон чемпионатлари финал босқичида энг кўп ўйинда ҳакамлик қилган, айни пайтда ЎФА биринчи вице-президенти лавозимида фаолият юритаётган Равшан Эрматов бошқарди.  

Ярим финал ўйинларида Жаҳонгир Қосимов ва Абдуҳамидулло Расулов ҳакамлик қилишди. "Vodiy Hamkor" ва "Lokomotiv" жамоалари ўртасидаги 3-ўрин учун кечган учрашувни эса Равшан Эрматовнинг жаҳон чемпионатларидаги қанот ҳаками қирғизистонлик Баҳодир Қўчқоров бошқариб борди.   

1/4 финал натижалари

Uzbek Chicago - Uz Galaxy 0:1

Lokomotiv - Toshkent 1:0

Marokanda - Vodiy Hamkor 4:5

UZB FC - Semurg 3:2

1/2 финал натижалари

Uz Galaxy - Vodiy Hamkor 1:0

Lokomotiv - UZB FC 2:4

3-ўрин учун баҳс

Vodiy Hamkor - Lokomotiv 0:1

ФИНАЛ

Uz Galaxy - UZB FC 1:2

Ўз тарихида олтинчи бор ўтказилган "Мустақиллик кубоги" турнири Ўзбекистоннинг АҚШдаги элчихонаси, Нью-Йорк шаҳридаги бош Консуллиги ҳамда Mahalla USA ҳамкорлигида ташкил этилди. Шу кунлари АҚШда ўзбек кунлари ҳам нишонланди. Шу сабабдан футбол турнирини таниқли ММА аралаш яккакураш устамиз Нурсултон Рўзибоев, хонандалардан Ўлмас Оллоберганов, Адҳам Солиев меҳмон сифатида кузатиб боришди.