Хабиб Нурмагомедов трилогияда Кормьега ғалаба тилади + ФОТО

Ушбу оқшомнинг марказий жанги оғир вазн тоифасида ўтказилиб, унда амалдаги UFC чемпиони Стипе Миочич америкалик собиқ жаҳон чемпиони, 41 ёшли Даниэль Кормьега қарши октагонга кўтарилади. 

Енгил вазнда UFC чемпиони, россиялик Хабиб Нурмагомедов бўлажак трилогияда Кормьега омад ва ғалаба тилади. 

"Олға ва омад! Октагонга сен кўтариласан, лекин мен ҳозирдан ҳаяжонланиб кетяпман. Муносиб рақибга қарши жангда ғалаба ёр бўлсин", — дея Кормьега атаб "Инстаграм-сторис"да хабар қолдирган Хабиб.

Эслатиб ўтамиз, Миочич ва Кормье шу кунгача ўзаро икки бор тўқнаш келишган. Биринчи жангда Даниэль Миочични мағлубиятга учратиб, чемпионлик камарини тортиб олган эди. 2019 йилнинг август ойида ўтган иккинчи тўқнашувда асли келиб чиқиши хорватиялик бўлган Стипе реванш олганди. Ўшандан бери ҳар икки спортчи ҳам жанг ўтказгани йўқ. Кормье натижа қандай бўлишидан қатъий назар Миочичга қарши жангдан сўнг фаолиятини якунлашини маълум қилган.