Халқаро енгил атлетика федерацияси америкалик спортчини Ўзбекистон терма жамоаси таркибида қайд этди

Гап америкалик Тьюрман МакМуллен ҳақида кетмоқда.

У енгил атлетиканинг тўсиқлар оша югуриш йўналишида мусобақаларда иштирок этади. Халқаро енгил атлетика федерацияси расмий сайти Тьюрманни Ўзбекитон терма жамоаси сафида қайд этмоқда.

Ушбу вазиятга ойдинлик киритиш мақсадида Ўзбекистон енгил атлетика федерацияси матбуот хизмати билан боғланганимизда, улар терма жамоа сафида бундай спортчи йўқ эканини, бу Халқаро енгил атлетика федерацияси хатоси бўлиши мумкинлиги айтилди.

Маълумот учун, Тьюрман МакМуллен тўсиқлар оша югуриш бўйича АҚШдаги бир қанча маҳаллий турнирлар ғолиби ва совриндори ҳисобланади. У айни дамда 110 метрга тўсиқлар оша югуриш бўйича дунё рейтингида 876-ўринни эгаллаб турибди. Шунингдек, Тьюрман Теннесси Университети талабаси ҳам ҳисобланади.