Халқаро каратэ федерацияси президенти МОҚ раҳбари билан учрашди

Ислом Каримов номидаги Тошкент халқаро аэропортида мартабали меҳмонни Ўзбекистон каратэ WKF федерацияси президенти Аламжон Муллаев кутиб олди. Бундан бир неча дақиқа аввал эса Ўзбекистон Миллий олимпия қўмитасида расмий учрашув бўлиб ўтди. 

МОҚ президенти Рустам Шоабдураҳмонов Антонио Эспиноза билан олимпия оиласига мансуб каратэ спорт туринининг юртимиздаги ривожи, ўзбек спортчиларининг жаҳон каратэсига қўшаётган ҳиссаси, шунингдек, пойтахтимизда бошланиш арафасида турган Осиё чемпионати, Токио Олимпиадаси ва бошқа қатор масалалар бўйича суҳбатлашди. 

Учрашувда Аламжон Муллаев, МОҚ вице-президенти Азизжон Камилов ҳам иштирок этди. Жаноб Эспинозага эса Халқаро каратэ WKF федерацияси вице-президенти, Осиё каратэ WKF президенти Генерал Нассер (БАА) ҳамда Саудия Арабистони каратэ WKF федерацияси президенти доктор Иброҳим Ал Ганнас ҳамроҳлик қилди.    

Учрашув сўнггида Рустам Шоабдураҳмонов Антонио Эспинозага эсдалик совғаси топширди. Бугун куннинг иккинчи ярмида Ўзбекистон жисмоний тарбия ва спорт вазирлигида ҳам учрашув бўлиб ўтади. 

Эслатиб ўтамиз, 19-21 июль кунлари пойтахтимиздаги "Ўзбекистон" спорт мажмуасида катталар ўртасидаги Осиё чемпионати бўлиб ўтади.