Халқаро хоккей федерациясига аъзо бўлишда Россия томони Ўзбекистонни қўллаб-қувватлайди

ХХФнинг навбатдаги конгресси жорий йил 25-27 сентябрь кунлари Италия пойтахти Римда бўлиб ўтади. Юқоридаги фикрни РХФ ижрочи директори Дмитрий Курбатов Олий хоккей лигаси доирасида пойтахтимиздаги “Humo Arena” муз саройида ўтказилган дастлабки ўйинга ташрифи чоғида таъкидлаб ўтган. Эслатиб ўтамиз, мазкур ўйинда «Хумо» жамоаси «Рязань» клубини йирик – 5:0 ҳисобида мағлуб этди.

«Биз Халқаро хоккей федерациясининг тўлақонли ва доимий аъзоси сифатида Ўзбекистонни мазкур ташкилот аъзолигига қабул қилиш учун овоз берамиз, - дейди Курбатов. – Шу билан бирга бу танловни ташкилотнинг бошқа аъзолари томонидан ҳам қўллаб-қувватланиши учун ҳаракат қиламиз».

Курбатовнинг айтишича, Ўзбекистон ХХФнинг аъзолигига қабул қилинишига асло шубҳа йўқ. Бу воқеа эса мамлакат хоккейи тарихида янги саҳифа очади.

Ўзбекистон хоккей федерацияси 2013 йил октябрь ойида тузилган. 2019 йил февралда узоқ йиллик танаффусдан сўнг мамлакат чемпионати тикланиб, мусобақада тўртта жамоа иштирок этди.

Пойтахтимизда кечган ОХЛнинг илк ўйинида Тошкентнинг «Хумо» жамоасини қўллаб-қувватлаш учун жуда кўп сонли хоккей мухлислари келишди. Шу куни муҳташам “Humo Arena” деярли тўлди. Бу эса мамлакатимизда қайтадан туғилган мазкур ажойиб спорт турига қизиқиш жуда юқори эканидан дарак беради.

Ушбу ҳафтада бу муҳташам мажмуада «Хумо»нинг яна иккита уй учрашуви бўлиб ўтади. 13 сентябрь куни жамоа Қозоннинг «Барс», 15 сентябрда эса Нижний Новгороднинг «Торпедо-Горький» клуби билан куч синашади.