Ханчжоу шаҳри Кураш бўйича Осиё чемпионатига ҳам мезбонлик қилади

Мазкур қитъа чемпионати, халқаро ҳакамлик семинари ва кураш ҳакамларининг бир юлдуз даражаси учун имтихонлар 2023 йилнинг 25-29 апрель кунлари ўтказилиши режалаштирилмоқда.

Халқаро Кураш ассоциацияси Бош котиби, техник директор Муҳаммад Реза Нассирий ва Ханчжоу-2022 Осиё ўйинлари ташкилий қўмитаси аъзолари ўртасида бир неча бор ZOOM платформаси орқали онлайн мулоқотлар бўлиб ўтди. 

Мулоқот жараёнида кўплаб ташкилий масалалар келишиб олинди. Унга кўра Осиё чемпионатида 15 та вазн тоифасида қитъанинг барча кураш миллий федерацияларидан курашчилар иштирок этиши мумкин. 

Баҳслар Ханчжоу шаҳрининг "Linpu" спорт мажмуасида бўлиб ўтади. Ҳакамлар семинари ва имтихонлари, антидопинг тестлари ҳам айнан мазкур спорт мажмуасида бўлиб ўтиши кутилмоқда.

Эслатиб ўтамиз, 2023 йилнинг 23 сентябридан 8 октябри кунига қадар Хитойнинг Ханчжоу шаҳрида XIX Ёзги Осиё ўйинлари бўлиб ўтади. Осиё Олимпиадаси сифатида эътироф этиладиган мазкур ўйинлар Дастуридан кураш спорти ҳам расман ўрин олган. Кураш баҳслари 2-5 октябрь кунлари "Linpu" спорт мажмуасида бўлиб ўтади.

25-29 апрель кунлари ўтказилиши режалаштирилаётган Осиё чемпионати Осиё ўйинлари олдидан ўзига хос тайёргарлик вазифасини ҳам ўтаб беради.