Хитой "Челленжер"ида ўзбек дербиси бўлиб ўтди

International Challenger-Zhangjiagang саралаш турнирида иккинчи рақам остида таснифланган ҳамюртимиз Ҳумоюн Султонов икки ғалабаси эвазига асосий тўр йўлланмасини қўлга киритган эди. Биринчи ракеткамиз Сергей Фомин эса рейтингдаги ўрни бўйича тўғридан-тўғри асосий тўрда қатнашиш ҳуқуқини қўлга киритганди.  

Эътиборлиси, қуръа натижасига кўра икки теннисчимиз асосий тўрнинг илк даврасида ўзаро тўқнаш келди. Бироз аввал якунига етган 1/16 финал учрашувида Султонов Фоминни 7/5, 6/0 ҳисобида мағлубятга учратди. 

Таққослаш учун, айни пайтда Султонов ATP рейтингида 466, Фомин 295-ўринни эгаллаб турибди. Саксон уч дақиқа давом этган баҳсда Ҳумоюн 13, Сергей 7 та эйс зарбасини амалга оширди. Қўшхатолар Фоминда уч баробар кўпроқ бўлди - 6 га 2. Теннисчиларимизнинг ўзаро учрашувларида Султонов олдинда бормоқда - 3:1. 

Энди Ҳумоюн Султонов 1/8 финалда австралиялик 24 ёшли Энцо Агиардга қарши кортга чиқади. ATP рейтингида 513-поғонасида бораётган Яшил қитъа вакили 1/16 финалда турнирда бешинчи рақам остида таснифланган, жаҳон рейтингида 255-ўринни банд этган япониялик Хаято Мацуокани мусобақадан чиқариб юборди - 6/3, 6/4.