Хитой Олимпия қўмитасининг испан спортчиларига совғаси

– Биз Хитой Олимпия қўмитасининг ҳозирги вақтда бизга бағрикенглик намунасини кўрсатганидан жуда миннатдормиз, – деди Испания Олимпия қўмитасининг президенти Алехандро Бланко. – Бу пандемия давом этаётган бугунги кунда дарёдан томчидек туюлса ҳам уларнинг бу ҳиммати жуда юқори баҳоланиши керак.

Алехандро Бланкодан COVID-19 пандемияси давом этаётган ҳозирги пайтда спорт олами қандай қилиб ўзига келиши мумкинлиги ҳақида сўрашганида, спортчиларнинг саломатлигидан хавотирда эканлигини, бу қандай давом этишини эҳтиёткорлик билан кузатаётганлигини билдирди.

Хитой Олимпия қўмитасининг Испания Олимпия қўмитасига ҳайрияси Халқаро олимпия қўмитасининг собиқ президенти Хуан Антонио Самаранч жамғармасининг кўмаклашуви билан амалга оширилди.

– Хитой Олимпия қўмитаси Испания спортидаги вазиятдан ташвишда эканлигини анчадан бери билдириб келаётган эди, – дейди Хуан Антонио Самаранч жамғармасининг раҳбари кичик Самаранч.

Кичик Самаранч, шунингдек, Хитой Олимпия қўмитасининг Испания Олимпия қўмитасига ҳайрияси испан спортчиларига ниқоб совға қилиш орқали улар саломатлигини ҳимоялаш мақсадини кўзлаганлигини алоҳида таъкидлади.

Маълумки, Испания коронавирусга чалинганлар сони бўйича ҳозир жаҳонда АҚШдан кейин иккинчи, Европада эса биринчи ўринни эгаллаб турибди. 20 апрелдаги расмий маълумотларга кўра, Испанияда коронавирусга 200 минг 210 киши чалинган, бу инфекциядан 20 минг 852 киши вафот этган.