Хивада узоқ кутилган “Баҳодирлар ўйини” бошланди ФОТО

Мусобақанинг тантанали очилиш маросими Хиванинг “Ичан қаъла”тарихий мажмуасига олиб кирувчи Ота дарвоза олдида бўлиб ўтди. Тадбирда Ўзбекистон Республикаси Туризмни ривожлантириш давлат қўмитаси, Жисмоний тарбия ва спорт вазирлиги, Хоразм вилояти ва Хива шаҳри ҳокимлиги ҳамда Халқаро ва Ўзбекистон Баҳодирлар ўйинлари ва тош кўтариш федерациялари вакиллари, шунингдек, оммавий ахборот воситалари ходимлари, спорт мухлислари ва сайёҳлар иштирок этдилар.

Ўз навбатида сўзга чиққан Хива шаҳар ҳокими Собиржон Жуманиёзов ва бошқалар мусобақанинг аҳамияти ҳақида фикр билдириб, беллашувларнинг юқори савияда ўтишига ишонч билдиришди. Шундан сўнг, хоразмлик санъат усталари иштирокида маданий дастур намойиш этилди. Очилиш тантаналари тугагач, спортчилар Паҳлавон Маҳмуд қабрини зиёрат қилишга йўл олишди. 

“Баҳодирлар ўйинлари”да дунёнинг энг сара 15 та спортчиси иштирок этмоқда. Жумладан, Павло Кордияко(Украина), Цху Хуанг(Хитой), Джереми Хогг(Австралия), Александр Кузмин(Россия), Вагнер Менесес Дос Сантоз(Бразилия), Вусал Мардонов(Озарбайжон), Реза Гжаетаси(Эрон), Иоаннис Папакалас(Греция),    Аикрам Сингх(Ҳиндистон), Мицуки Тойота(Япония), Сергей Трубицин, Ҳамза Примов, Ғиёсиддин Аҳмедов, Шуҳрат Алиханов(ҳаммаси Ўзбекистон)лар ғолиблик учун курашмоқда.

Ниҳоят, дастлабки беллашув бўлиб ўтди. Унда қатнашчилар “Қўқон арава” деб номланган машқни тезкорлик билан бажариш бўйича куч синашишди. Қоидага кўра, спортчилар ҳар бирининг ичига оғирлиги 100 килограммдан қум тўлдирилган 2 та қопни аравага юклаб, белгиланган масофага элтиб қўйиши лозим бўлди. Айни дамда, турнир дастуридан ўрин олган мусобақалар давом этмоқда.

Икром Худойберганов