Хизмат кўрсатган мураббий Конисбековнинг Қозоғистон фуқаролигини олганига муносабат билдирди

Конисбеков Ўзбекистон чемпионатининг ярим финалида жаҳон чемпиони Асадхўжа Мўйдинхўжаевга ҳакамларнинг баҳсли қарори билан ютқазиб қўйганди. Қозоғистонда хизмат кўрсатган мураббий, таниқли бокс мутахассиси Жумабек Омурзаков Kazinform агентлиги мухбирига берган интервьюсида Аман Конисбеков ҳақида фикр билдирди.

— Йигит бизнинг мамлакатга келди, лекин бу ерда ҳеч ким унга терма жамоада жой кафолатламаган. Ўзини меҳнати билан ҳаммасини исботлаши керак. Маҳаллий боксчилардан бир бош баланд эканини амалда кўрсатиши лозим. Бу унинг қўлидан келадими? Бу энди катта савол. Бошқа томондан олиб қарасак, Бахит Сарсекбаев мен айтган нарсани ўзини кучи ва интилиши билан исботлаган. Унинг Ўзбкистондан Қозоғистон терма жамоасига ўтиши омадли бўлганди. Бахит Қозоғистон шарафини ҳимоя қила туриб, Осиё чемпиони, Осиё ўйинлари ғолиби ҳамда энг муҳими Олимпиада чемпиони бўлган эди. Сарсекбаевнинг Қозоғистонга келган илк пайтларини кечагидек яхши эслайман. У ишончни муштларига жамлай олган ва бунинг натижасида рингда рақибларидан катта устунликка эришганди. Аман Конисбеков Бахитнинг муваффақиятини такрорлай оладими? Бу саволга фақат вақт жавоб беради, — деди Омурзаков.

Омурзаковнинг сўзларига қараганда, сўнгги йилларда Ўзбекистон бокси олдинга катта қадам ташлаган.

— Қўшни мамлакатда боксда жуда катта эътибор қаратилмоқда. Улар ўз ватанлари ва спорти йўлида ҳамжиҳатликда ҳаракат қилишяпти. Бу борада Ўзбекистондан ўрганадиган жиҳатларимиз кўп, — дея фикрига якун ясади Қозоғистонда хизмат кўрсатган мураббий.