“Хоразм кузи”да ғолиб ва совриндорлар аниқланди

Айниқса, ҳазорасплик халқаро гроссмейстер Нодирбек Яқуббоев, халқаро аёллар гроссмейстери Нилуфар Якуббоеванинг номи нафақат мамлакатимиз, балки жаҳон шахмат оламида ҳам машҳур.

Айни дамда вилоятнинг шаҳар ва туманларидан уларнинг муносиб издошлари етишиб чиқмоқда. Турли миқёсда ўтказилаётган мусобақалар ёшларнинг қобилиятини рўёбга чиқаришга хизмат қилаётир. 

Шубҳасиз, Урганч шаҳрида ташкил этилган “Хоразм кузи” вилоят очиқ турнири ана шулар сирасига киради. Бир неча кун давом этган ушбу мусобақада 5 ёшдан 12 ёшгача бўлган 50 нафарга яқин ёш “ақл гимнастикаси” соҳиби етти ёш тоифасида ўзаро дона сурди. Таъбир жоиз, унда кўплаб янги иқтидор эгалари кашф қилинди.

Турнир якунида ғолиб ва совриндор шахматчилар ташкилотчилар томонидан тақдирланишди.