Хоразм вилояти спортчилари учун онлайн машғулот ташкил этилди

Барчага маълум, ҳозирги вақтда юртимизда қатъий карантин ҳолати давом этмоқда, аммо шунга қарамасдан Ўзбекистон стол тенниси федерацияси вакиллари спортчиларнинг маҳоратларини ошиб бориш мақсади «ZООМ» иловаси орқали онлайн машғулотларни ташкил этишда давом этмоқда. Бу сафарги онлайн машғулотда Хоразм вилояти терма жамоаси мураббийлари ва спортчилари иштирок этишди. Машғулотни Хоразм терма жамоаси мураббийи Фарруҳ Ражабов олиб борди. Тадбирни федерация раҳбарияти кузатиб борди.

«Бугунги ҳолатда ҳеч кимга осон бўлмаяпти. Карантин сабабли барча мусобақалар, машғулотлар ва тадбирларни онлайн ўтказмоқдамиз. Ҳозирда давом этаётган қийин ҳолатга қарамасдан, тўлиқ куч билан ишлаётган федерация ходимлари, барча мураббийларга миннатдорчилик билдираман. Карантин қачон тугашини ҳеч ким билмайди, шу сабабли онлайн тарзда машғулотларни давом эттиришимиз керак. Сабаби ҳеч бир стол теннисчимиз жисмоний холати ва техникасини йўқотмаслиги лозим. Карантин вақтида бир нечта мусобақалар ташкил этилди ва ҳозирда 10 -14 ёш тоифасида навбатдаги онлайн турнир давом этмоқда», - дейди Ўзбекистон стол тенниси федерация раиси Саида Маҳмудова.

Онлайн машғулот давомида ёш теннисчиларимиз учун Осиё стол тенниси федерацияси томонидан тайёрланган ўқув-қўлланма ҳам намойиш этилди. Бу қўлланма орқали стол теннисчи ва мураббийлар ўзи учун керакли ва фойдали маслаҳатларини олишга муваффақ бўлди.

«Тўғри ҳозир карантин, лекин бу дегани машғулотларни тўхтатиб қўйишимиз керак дегани эмас. Ҳар бир стол теннисчи учун алоҳида машғулот дастури ишлаб чиқилган ва буларни барчасини онлайн тарзда кузатиб бормоқдамиз»,- деди вилоят терма жамоаси мураббийи Фарруҳ Ражабов.

Тадбир якунида иштирокчилар ўзларини қизиқтирган саволларига мутахассислардан батафсил жавоб олдилар.