Хоразмда “Биз коронавирусни биргаликда енгамиз!” хайрия акцияси давом этмоқда

Бу борада, мамлакатимизда ҳам тегишли ва самарали ишлар амалга оширилаётир. Шундай синовли пайтда аҳолининг ижтимоий ҳимояга муҳтож бўлган қатлами, кам таъминланган оилаларга моддий ёрдам кўрсатиш, бемор ва қариялар ҳолидан хабар олиш мақсадида корхона ва ташкилотлар, тадбиркорлик субъектлари хайрли ишларни амалга оширишяпти. Муболаға эмас, бу азал-азалдан, авлоддан авлодга  ўтиб келаётган миллий урф-одат ва қадриятларимиз силсиласидир.    

Бугунги кунда Хоразм вилояти жисмоний тарбия ва спорт бошқармаси томонидан “Биз коронавирусни биргаликда енгамиз!” шиори остида ўтказилаётган хайрия акцияси доирасида воҳанинг шаҳар ва туманларида истиқомат қилаётган кекса спорт фахрийлари, яъни турли йилларда спорт ташкилотларида ишлаган инсонлар, жисмоний тарбия фани ўқитувчилари, тренерлар ва спортчи фахрийлар ҳолидан хабар олинмоқда.  

Айни дамда, акция тадбирлари воҳанинг барча шаҳар ва туманларида давом этмоқда. Жумладан, вилоят  жисмоний тарбия ва спорт бошқармаси бошлиғи Шакир Мадаминов шу кунларда боғотлик Қадамбой Рўзметов, Шоназар Йўлдошев, гурланлик Йўлдош Содиқов, Рустам Ортиқбоев, Урганч туманида яшовчи Ёвбосар Шомуратовлар хонадонида бўлиб, ҳол-аҳвол сўрашди. Ўз навбатида уларни маънан қўллаб-қувватлаш мақсадида вилоятда жисмоний тарбия ва спортни янада  ривожлантириш, етук спортчиларни вояга етказиш, бунинг баробарида, ёшларни соғлом руҳда тарбиялаш йўлидаги кўп йиллик самарали меҳнатлари учун бошқарманинг ташаккурномаси, шунингдек, коронавирус карантини даврида ёрдам тариқасида озиқ-овқат маҳсулотларини топширди.

“Биз коронавирусни биргаликда енгамиз!” шиори остида уюштирилаётган мазкур хайрия акциясида тизим ташкилотлари, шаҳар ва туманлар бўлимлари, спорт таълими муассасалари ва спорт мактаблари жамоаларининг ҳаммаси фаол иштирок қилмоқдалар.

Икром ХУДОЙБЕРГАНОВ тайёрлади