Хоразмда гимнастика бўйича Ўзбекистон очиқ чемпионати бўлиб ўтди

Ўзбекистон Жисмоний тарбия ва спорт вазирлиги ва Гимнастика федерацияси ҳамкорлигида ташкил этилган мусобақада юртимизнинг турли ҳудудларидан ташриф буюрган 17 та жамоадан 500 нафарга яқин гимнастикачилар олти номинациядаги медаллар учун баҳсга киришдилар.

Уч кун давом этган мусобақада 14 ёшгача бўлган қизлар, аралаш ва 45 ёшдан юқори бўлган аёллар жамоалари тайёрлаган композициялар ижро маҳорати, рақс ва гимнастика элементларини бажариш қобилияти бўйича баҳоланди.

Мусобақа иштирокчилари орасида гимнастика билан мунтазам шуғулланаётган спортчилар билан бирга мактаб ва коллежлар ўқувчилари, уй бекалари, корхона ва ташкилотлар ходимлари ҳам борлиги гимнастика аҳолининг барча қатламлари ўртасида кенг оммалашаётганидан далолатдир.

“Ёшлик” (Хоразм), “Шумтакалар” (Жиззах), “Янги кун” (Нукус), “Стар” (Самарқанд), “Дўстлик” (Андижон), “Боғишамол” (Навоий) ва “Шўх қизлар” (Жиззах) жамоаларининг чиқишлари мухлису мутахассислар томонидан юқори баҳоланиб, турли номинациялар билан тақдирланди.

Мусобақа бош соврини – Ўзбекистон гимнастика федерацияси кубогини пойтахтнинг “Эвикидс” жамоаси қўлга киритди.