Хоразмда Мустақиллик байрамига бағишланган спорт мусобақалари ташкил этилди

Жумладан, Хоразм вилоятининг барча ҳудудларида ҳам Олимпия ва миллий спорт турлари бўйича вилоят биринчиликлари ташкил қилинмоқда.

Урганч шаҳридаги вилоят Бадминтон марказида 2001 йилда туғилган ва ундан кичик ёшдаги ўғил-қизлар иштирокида бадминтон бўйича вилоят биринчилиги бўлиб ўтди. Мазкур мусобақада ҳар бир туман (шаҳар)дан энг кучли 2 нафардан ёш бадминтончи иштирок этди.

Шунингдек, Урганч шаҳридаги 2-сон умумтаълим мактаби спорт залида стол тенниси бўйича 2008-2009 йилларда туғилган ўғил-қизлар иштирокида Хоразм вилояти чемпионати ташкил қилинди. Ёш стол теннисчиларнинг ўзаро баҳслари ҳам қизғин баҳсларга бой бўлди.

Мусобақаларни ташкил қилиш жараёнида бир неча ой давомида масофавий шаклда машғулотларда иштирок этган ёш спортчиларимиз ўз маҳоратларини қай даражада оширганликларини намоён этишди. Бундан ташқари, ушбу мусобақа орқали мураббийларимиз ҳам шогирдларининг техник камчиликларини аниқлаш ва келгуси машғулотларда шу жиҳатларга эътибор қаратиш имконига эга бўлдилар. Мусобақа ғолиб ва совриндорлари Хоразм вилояти жисмоний тарбия ва спорт бошқармаси томонидан диплом ва медаллар билан тақдирланди.

Ҳар иккала мусобақа ҳам карантин қоидаларига тўлиқ риоя қилинган ҳолда ташкил этилди.