Хоразмда регби бўйича семинар ўтказилди ФОТОГАЛЕРЕЯ

Ушбу спорт турини аҳолининг кенг қатламлари орасида тарғиб қилиш ва оммавийлигини янада ошириш, бунинг баробарида тайёргарлик жараёнларини талаб даражасида ўтказилишини таъминлаш, маҳоратли спортчиларни тайёрлаш ва малакасини ошириш  учун етарли шарт-шароит ва имкониятлар яратиш йўлида ислоҳотлар олиб борилмоқда. 

Албатта, бу борада Ўзбекистон Республикаси Президентининг “Ўзбекистон Республикасида регби спорт турини ривожлантириш чора-тадбирлари тўғрисида”ги қарори дастуриламал вазифасини ўтаётир. Жойларда ушбу қарорни ҳаётга тадбиқ этиш мақсадида ибратли ишлар амалга ошириляпти. 

Хусусан, жорий йилнинг 9-15 декабрь кунлари Урганч шаҳридаги “Ёшлик” спорт мажмуасида ўқув-амалий семинар бўлиб ўтди. 

Шимоли-Ғарбий ҳарбий округи, Хоразм вилояти ҳокимлиги, шунингдек, вилоят жисмоний тарбия ва спорт бошқармаси, Ўзбекистон регби федерацияси ва унинг вилоят ҳудудий бўлими ҳамда бошқа ташкилотлар ҳамкорлигида уюштирилган семинарда 400 нафардан зиёд регбичи ва мураббийлар назарий ва амалий билимларини бойитишди, тажриба ва малакаларини юксалтиришди.

Машғулотларни Ўзбекистон регби федерацияси ижрочи директори Рустам Набиев олиб борди. Қорақалпоғистонлик мутахассислар - Антон Михайлов, Ерназар Махамбеткаримов, Жеткер Базаров ва Абдусаид Киясовлар ассистентлик қилишди.

Уюштирилган ўқув-машғулот жараёнлари хоразмлик регбичилар учун фойдадан ҳоли бўлмади. Бинобарин, семинар якунида ташкил этилган “Регби-7” ва “Регби-15” бўйича ўйинлар Хоразм вилояти терма жамоасига номзодларни саралаб олиш имконини ҳам берди. 

Икром ХУДОЙБЕРГАНОВ, Урганч шаҳридан