15 дек 11:56
Янгиликлар

Гандбол

Хоразмлик гандболчи қизлар Ўзбекистон чемпиони ФОТОГАЛЕРЕЯ

9-14 декабрь кунлари Урганч шаҳридаги “Ёшлик” спорт мажмуасида U-17 ва ундан кичик ёшдаги қизлар ўртасида гандбол бўйича Ўзбекистон чемпионати бўлиб ўтди.

Ўзбекистон Республикаси Туризм ва спорт вазирлигининг спорт ва оммавий жисмоний тарбия тадбирларининг 2021 йилги тақвим режасига асосан, Ўзбекистон гандбол федерацияси томонидан ташкил этилган мусобақада Қорақалпоғистон Республикаси, Хоразм, Сурхондарё, Навоий, Жиззах, Андижон вилоятлари ҳамда Урганч олимпия захиралари коллежи жамоалари иштирок этди.

Мусобақада асоси Урганч туманидаги 19-сон умумтаълим мактабининг ўқувчилари, хусусан, СЎЕАИБЎСМ тарбияланувчиларидан ташкил топган Хоразм вилояти жамоаси 2021 йилги Ўзбекистон чемпиони номига сазовор бўлди.

Шоҳсупанинг иккинчи поғонасини Андижон вилояти жамоаси эгаллади. Сурхондарё ва Навоий вилоятлари жамоалари эса фахрли учинчи ўриндан жой олишди.

Чемпионатнинг тақдирлаш маросимида қатнашган Хоразм вилояти Туризм ва спорт бош бошқармаси бошлиғи ўринбосари Нодира Жуманиязова ғолиб ва совриндор спортчиларни эришган муваффақиятлари билан муборакбод этиб, келгуси фаолиятига омадлар тилади. Ўз навбатида уларга тегишли даражадаги медаль, диплом ва совғалар топширилди.

Фурсатдан фойдаланиб, мазкур мусобақани юқори савияда ўтишига Ўзбекистон “Ёшлик” жисмоний тарбия ва спорт жамияти Хоразм вилояти минтақавий бўлими (раис ўринбосари С.Досов) ҳамда Спорт ўйинлари ва енгил атлетикага ихтисослаштирилган болалар-ўсмирлар спорт мактаби (директори Ж.Абдуллаев) муносиб улушини қўшганлигини алоҳида таъкидлаб ўтиш жоиздир.