Хоразмлик ёш мерганлар Бухорога боришади

Хоразм вилоят техник ва амалий спорт турлари маркази томонидан ташкил этилган мазкур мусобақада 16 та жамоанинг 2002 йилда туғилган ва ундан кичик ёшдаги жами 60 нафардан зиёд ўғил ва қизлари мерганлик маҳоратини намойиш этишди.

Қизиқарли кечган баҳслар якунига кўра, пневматик милтиқдан ўқ отиш бўйича Ўизбекистон ўқ отиш спорти федерациясининг вилоят бўлими аъзолари Сара Сотипова қизлар орасида, Диёрбек Очилов ўғил болалар биринчилигида шохсупанинг энг юқори поғонасига кўтарилишди. 

Пневматик тўппончадан ўқ отиш машқини бажаришда эса Урганч шаҳар ўқув спорт техника клуби спортчиси Азиза Исмоилова ҳамда Ҳазорасп автомобиль мактаби вакили Жалоладдин Бахтиёров ғолибликни қўлга киритди. 

Шунингдек, Шаҳноза Машарипова (Урганч тумани ЎСТК), Гулбадан Абдуллаева, Одамбой Раҳимов (иккаласи Қўшкўпир тумани ЎСТК), Шукуржон Адамбоева, Нусрат Сапарбоев (иккаласи Шовот тумани ЎСТК),  Нодира Сотимбоева (Ҳазорасп автомобиль мактаби), Зафарбек Бобохонов (Боғот тумани ЎСТК), Жавоҳир Рўзметов (Боғот тумани “Равон” ЎСТК)  совриндорлар сафидан жой олишди. 

Мусобақанинг ёпилиш маросимида ғолиб ва совриндор бўлган ёш мерганлар ташкилотчилар томонидан диплом ва совғалар билан тақдирландилар. 

Умумжамоа ҳисобида биринчи ўринни Боғот тумани ўқув спорт техника клуби спортчилари эгаллашди. Иккинчи ўриндан Ҳазорасп автомобиль мактаби жамоаси жой олди. Фахрли учинчи ўрин Қўшкўпир тумани ўқув спорт техника клуби вакилларига насиб этди.

Эндиликда энг яхши кўрсаткичга эришган хоразмлик спортчилар шу ойнинг иккинчи ўн кунлигида Бухоро шаҳрида ташкил этиладиган Ўзбекистон биринчилигида воҳа шарафини ҳимоя қилишади.

Икром ХУДОЙБЕРГАНОВ тайёрлади