Хотира ва қадрлаш кунига бағишлаб ўтказилган поло мусобақасидан ФОТОРЕПОРТАЖ

Ўзбекистон Республикаси Президентининг 2021 йил ПП-5024 “Ўзбекистон Республикасида йилқичилик ва от спортини ривожлантириш ҳамда замонавий бешкураш ва поло спорт турини оммалаштириш бўйича қўшимча чора-тадбирлар тўғрисида”ги қарори ижросини таъминлаш мақсадида мамлакат поло федерацияси Тошкент вилоятининг Қибрай туманидаги “Универсал жампинг агро” от спорти клубида  байрам тадбирини ўтказди.

 Хотира ва қадрлаш куни муносабати билан ўтказилган байрам тадбирида ҳарбий техникалар намойиши ҳам бўлиб ўтди. Дала ошхонаси фаолиятидан йиғилганлар баҳраманд бўлдилар.

Мудофаа вазирлиги ҳарбий ансамбли артистлари ижросида уруш йилларида айтилган қўшиқлар ижро этилди. Тадбирга ташриф буюрган фахрийларга Қибрай тумани ҳокимияти, Поло федерацияси, “Богатир” ширинлик маҳсулотлари томонидан совғалар ҳадя этилди.

Йиғилганлар Оҳангарон туманининг “Олтин қанот” ҳамда Тошкент туманининг “Байир” жамоалари ўртасида бўлиб ўтган улоқ-кўпкари баҳсларини ҳаяжон ила кузатдилар.

Сўнгра поло бўйича финал баҳслари  бўлиб ўтди. Қашқадарёлик чавандозлар ва “Универсал жампинг агро” ўртасида кечган ўйин 7:0 ҳисобида қашқадарёликлар фойдасига ҳал бўлди. Сўнгги ўрин Зангиота тумани жамоасига насиб этди.

Суратлар муаллифи - Алимурод МАМАДАМИНОВ, ўз мухбиримиз