Хуршид Тожибоев проф рингдаги илк жангидан сўнг қандай фикрда?

Польшанинг Ломжа шаҳрида бўлиб ўтган бокс оқшомида ҳамюртимизга мезбон боксчи Кристзоф Роговски рақиблик қилди. Олти раундга мўлжалланган жанг муддатидан аввал якунланди. Иккинчи раундда Хуршид рақибини техник нокаутга учратди. 

Ғалабали жангидан сўнг Хуршид Тожибоев olamsport.com сайти учун интервью берди.

"Ушбу жангга тайёргарликни Испанияда ўтказдим. Ўйлайманки, тайёргарлик ёмон ўтмади. Бугун ғалаба қозондим ва бундан жудаям хурсандман.

Жангдан таассуротларим жуда яхши. Профессионал боксдаги илк жангим. Ундан олдин ҳам АPB Pro Boxing да ҳам жанг қилганман. Менимча, катта фарқ қилмайди. 

Кейинги жангимдаги рақиб ҳали маълум эмас. Ҳозирча Ўзбекистонга - оилам олдига бориб келмоқчиман. Шундан сўнг яна машғулотларга қайтаман. 

Мени қўллаб-қувватлаб турган барча ватандошларимга, мухлисларга катта раҳмат. Дуо қилиб қўллаб туришгани учун ўз миннатдорчилигимни изҳор қиламан", - деди Хуршид Тожибоев.

Дилдора Холбоева суҳбатлашди