Хушхабар: Энди бадиий гимнастикачимиз ўсмирлар Олимпия ўйинларига лицензия қўлга киритди

Ўсмирлар Олимпия ўйинларига қизғин тайёргарлик кўраётган гимнастикачиларимиз делегациямиз ҳисобига яна битта йўлланма қўшиб қўйдилар. Малайзияда бадиий гимнастика бўйича ўтказилаётган Осиё чемпионатида Ўзбекистон терма жамоаси умумжамоа ҳисобида иккинчи ўринни эгаллади ва ўсмирлар Олимпия ўйинлари лицензиясини қўлга киритди. Октябрь ойида ким Аргентинага бориши эса Ўзбекистон гимнастика федерацияси ўтказадиган саралашдан сўнг маълум бўлади.

Ушбу муваффақият орқали Ўзбекистон гимнастика федерацияси ҳозирга қадар максимал – 4та лицензияни қўлга киритди. Бунгача спорт акробатикаси (1та) ва спорт гимнастикаси бўйича (2та) йўлланмаларга эга чиқилгани ҳақида хабар бергандик. Ҳали олдинда 17-21 май кунлари Филиппинда бўлиб ўтадиган трамполин бўйича Осиё чемпионати кутиб турибди. Биз мазкур қитъа биринчилигида ҳам терма жамоамиз аъзоларига омад тилаб қоламиз. Ўз навбатида, муваффақият билан Ўзбекистон гимнастика федерациясини табриклаймиз.

Миллий олимпия қўмитаси шуни маълум қиладики, айни пайтда III ёзги ўсмирлар Олимпия ўйинларига 17 нафар ўзбекистонлик спортчи 15 та лицензия қўлга киритган. (Академик эшкак эшиш ва спорт акробатикасида 2 кишилик жуфтликка биттадан лицензия берилган.)

Демак, бугунги кун ҳолатига кўра Ўзбекистонлик спортчилар III ёзги ўсмирлар Олимпия ўйинларига қўйидаги спорт турларида йўлланмаларга эга бўлиб улгуришди:

Оғир атлетика – 3 та
Байдарка ва каноэда эшкак эшиш – 3 та
Академик эшкак эшиш – 2 та
Спорт акробатикаси – 1 та
Спорт гимнастикаси – 2 та
Бадиий гимнастика – 1 та
От спорти (конкур) – 1 та
Таэквондо – 1 та
Бокс – 1 та

Ўсмирлар Олимпия ўйинларига қадар бу рўйхат ҳали кенгаяди ва насиб қилса Ўзбекистон спорт делагацияси Буэнос-Айресга бундан ҳам катта таркибда йўл олади.