ХХХ Бутунжаҳон ёзги Универсиада ўйинлари ғолиблари тантанали кутиб олинди

Унда Ўзбекистон спорт делегацияси иккитадан олтин ва кумуш ҳамда тўртта бронза, жами саккизта медаль жамғарган ҳолда 112 та давлат орасида умумжамоа ҳисобида 19-ўринни эгаллади.

10 кун давом этган ушбу нуфузли мусобақада сайёрамизнинг 112 та давлатидан келган жами 5 971 нафар спортчи 18 та спорт тури бўйича 222 та медаллар жамланмаси учун баҳс олиб борди.

Кеча делегациямизнинг қолган аъзолари, универсиадада таэквондо ва дзюдо бўйича баҳсларда совриндор бўлган спортчиларимиз юртимизга қайтиб келди. Италиядан ёруғ юз билан қайтган вакилларимиз Ислом Каримов номидаги Тошкент халқаро аэропортида тантанали тарзда кутиб олинди. Тадбирда Жисмоний тарбия ва спорт вазирлиги, тегишли федерациялар мутасаддилари, спортчиларнинг яқинлари, мухлислар ва оммавий ахборот воситалари ходимлари иштирок этишди.

Кутиб олиш маросимида иштирок этган Жисмоний тарбия ва спорт вазирининг биринчи ўринбосари Ойбек Қосимов талаба спортчиларимизни ғалабалар билан қутлар экан, улардан келгусидаги нуфузли мусобақаларда ҳам шу каби зафарли юришлар кутилаётганини маълум қилди.

Эслатиб ўтамиз, ёзги универсиадада дзюдочиларимиздан Диёра Келдиёрова (-52 кг), Ҳикматилло Тўраев (-73 кг) Муҳаммадкарим Хуррамов (-100 кг) ва Давлат Бобонов (мутлақ вазн) бронза медални ҳамда таэквондочимиз Ниёз Пўлатов кумуш медални қўлга киритган эди.