Ядонг Усман Нурмагомедовнинг ҳаракатларига муносабат билдирди

Хитойлик аралаш яккакураш устасининг доғистонликка нисбатан ҳеч қандай даъвоси йўқ.

"Мен бу одам қаердан пайдо бўлганини ҳам тушунмадим – у шунчаки рўпарамда пайдо бўлиб, йўлимни тўсди. Кейин у мени бироз туртиб юборди, шунинг учун мен уни четга суриб, йўлимда давом этдим. Аммо такрорий лавҳани секинлаштирилган режимда кўрганимда, у худди тирсаги билан мени урмоқчи бўлгандек ёки шунга ўхшаш бирор нарса қилмоқчи бўлгандек туюлди. Аслида эса мен уни тушунаман, чунки улар ака-ука.

Жангдан олдин улар менга, мен эса уларга нисбатан ҳеч қандай адоватда эмасдик. Ҳеч қандай ёмон сўзлар, ҳақоратлар ёки шунга ўхшаш нарсалар бўлмаган. Шунинг учун интернетда ёзилганидек, у қасддан менга ҳужум қилмоқчи бўлгани ҳақидаги гаплар ҳақиқатдан йироқ. У шунчаки мен унга ҳужум қилгани югуриб келяпман деб ўйлаган. У укасининг аҳволини кўриш учун югуриб чиқди ва тўсатдан кимдир тўғри унинг устига югуриб келди. Албатта, бундай вазиятда ҳар ким шундай муносабат билдиради. Секинлаштирилган лавҳада ҳамма унинг кўзлари юмилганини кўриши мумкин", – деди Сонг BiliBili нашрига берган интервьюсида.

Усман Нурмагомедовнинг ўзи ҳам шунга ўхшаш баёнот бериб, агар ҳақиқатан ҳам хитойлик жангчини урмоқчи бўлганида, буни амалга оширган бўлишини таъкидлади.

Шанхайдаги UFC Fight Night 286 турнирида россиялик рақибини иккинчи раундда нокаутга учратган Сонг Ядонг ташкилотнинг енгил вазн тоифаси мета-рейтингида уч поғонага кўтарилиб, учинчи ўринни эгаллаб турибди. Умар Нурмагомедов эса иккинчи ўриндан бешинчи ўринга тушиб кетди.