29 июл 21:08
Янгиликлар

Спорт курашлари

Яна бир эркин курашчимиз Жаҳон чемпионатининг финалига чиқди!

Болгариянинг София шаҳрида спорт курашлари бўйича ўсмирлар ўртасида ўтказилаётган жаҳон чемпионатининг биринчи кунги баҳслари якунига етиб бормоқда.

Қувонарлиси, ҳозиргина яна бир эркин курашчимиз жаҳон чемпионатининг финал беллашувида гиламга чиқиш ҳуқуқини қўлга киритди. -55 кг вазнда гиламга чиқаётган ўсмирлар Олимпиадаси ғолиби Умиджон Жалолов ярим финал баҳсида туркиялик Муҳаммад Каравусни 8:0 ҳисобида доғда қолдирди.

Истеъдодли курашчимизнинг олтин медал учун баҳсдаги рақиби эронлик Маҳди Меҳрдод Вейси бўлади. Умид ва Маҳди шу кунгача ўзаро уч маротаба тўқнаш келишган бўлиб, барча беллашувларда ҳамюртимизнинг қўли баланд келган. Вейси ярим финалда АҚШ вакили Роберт Келли Ховарддан устун келди.

Маълумот учун, Асрор Хўжамуродов қўл остида жаҳон чемпионатига ҳозирлик кўрган Умиджон Жалолов ярим финалга қадар канадалик Фотис Дэвид Пападопоулосни 10:0, қирғизистонлик Мирбек Сарабековни 10:0, ҳиндистонлик Аман Аманни 3:0 ҳисобида мағлуб этган эди.

Финал ҳамда бронза медали учун кечадиган беллашувлар эртага ўтказилади.