Яна бир кучли гроссмейстерни мағлуб этган 15 ёшли Нодирбек Магнус Карлсендан ўтиб кетди

Мусобақада амалдаги жаҳон чемпиони норвегиялик Магнус Карлсен, жаҳон вице-чемпионлари Вишванатан Ананд (Ҳиндистон), Фабион Каруана  (АҚШ), Сергей Карякин (Россия) каби машҳур шахматчилар дона суришяпти. 

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Кеча ўтказилган 5-партияда истеъдодли шахматчимиз, 15 ёшли халқаро гроссмейстер Нодирбек Абдусатторов оқ доналарда ўйнаб, рейтингда ўзидан анча юқорида турган хорватиялик халқаро гроссмейстер Иван Сарич (2667)ни мағлуб этишни уддалади. Нодирбек 4-турда польшалик халқаро гроссмейстер Каспер Пёрун (2643)ни ҳам мағлубиятга учратган эди.

Ушбу ғалабалар сабаб Абдусатторов 3,5 очко билан мусобақа жадвалида қўшимча кўрсаткичларга кўра 8-10 ўринларни эгаллаб турибди. Амалдаги жаҳон чемпиони Магнус Карлсен ҳам кечаги ғалабасидан сўнг ўз очколарини 3,5тага етказиб олди, лекин у ҳозирча 12-поғонадан жой олган.