11 июн 11:20
Янгиликлар

Бокс/ММА

Яна бир UFC турнирининг марказий жанги тасдиқланди

Ҳар ҳафта қизиқарли жанглар "гулдастаси" билан аралаш яккакураш мухлисларини хушнуд этиб келаётган UFC босслари яна бир турнирнинг марказий жангини эълон қилишди.

Яримўрта вазн тоифаси вакиллари - бразилиялик Гилберт Бернс ва америкалик Шон Брэди ўртасидаги тўқнашув 7 сентябрь куни ўтказиладиган UFC турнирининг марказий жанги мақомида бўлади. Ҳар икки аралаш яккакураш устаси ҳам ушбу жангга розилик берган, фақат шартномага имзо қўйилса бўлди.

UFC чемпионлик камарига собиқ даъвогар Гилберт Бернс кетма-кет иккита жангида мағлубиятга учраган. У Белал Муҳаммадга очколар ҳисобига кўра имкониятни бой берган бўлса, Жек Делла Маддаленадан нокаутга учраган эди.

Шон Брэди сўнгги жангида Келвин Гастелумни учинчи раундда кимура усули билан муддатидан аввал таслим этганди. Ундан аввал эса профессионал фаолиятидаги ягона мағлубиятини Белал Муҳаммаддан қабул қилиб олганди. Белал Шонни иккинчи раундда техник нокаутга учратганди.

Айни пайтда Гилберт Бернс ҳамда Шон Брэди яримўрта вазн тоифаси UFC рейтингида мос равишда олтинчи ва саккизинчи ўринларни эгаллаб туришибди.