Янги босқич, янги марралар: ЎзДЖТСУда биринчи курс талабалари учун ўқув йили бошланди

Шу муносабат билан “Биринчи курс мактаби” дастури доирасида тантанали тадбир ўтказилди. 

Ўзбекистон Республикаси Давлат мадҳиясининг янграши билан бошланган тантанали тадбирда Спорт вазирлиги бўлим бошлиғи М.Арзиқулов, университет раҳбарияти, профессор-ўқитувчилар, биринчи босқичга қабул қилинган талабалар ҳамда уларнинг ота-оналари иштирок этди. 

Тадбирда сўзга чиққанлар Ўзбекистон давлат жисмоний тарбия ва спорт университети нафақат мамлакатимизда, балки бутун МДҲ давлатлари орасида ҳам ўзининг илмий салоҳияти, замонавий таълим дастурлари, етук кадрлар тайёрлаш тажрибаси ва халқаро ҳамкорликдаги нуфузли ўрни билан эътироф этиб келинаётгани таъкидланди. 

Тадбир иштирокчилари янги ўқув йилида илк қадам қўяётган талабаларга 4 йил давомида самарали ва муваффақиятли таълим олишлари, янгидан янги спорт марраларини забт этишлари ҳамда ўз устида мунтазам ишлаш орқали етук спортчи-мураббий бўлиб етишишларини тиладилар. 

Шунингдек, “Биринчи курс мактаби” дастурининг бошланиши талабаларга нафақат академик билимларни эгаллаш, балки университет муҳитига тезкор мослашиш, янги дўстлар орттириш, ижтимоий фаол бўлиш ва ўз қобилиятларини намоён этиш учун кенг имкониятлар яратиши қайд этилди.