Янги чемпион Фабио Уордлининг қачон қайтиши айтилди

Хабарда айтилишича, WBC, IBF ва WBA чемпионлик камарлари соҳиби Александр Усик билан бирлаштирувчи жанг умидидан воз кечилган. Унинг ўрнига келаси йилнинг апрель ойида биринчи чемпионлик ҳимоя жангини ташкил этиш режалаштирилмоқда.

Мутлақ жаҳон чемпиони Александр Усик Жозеф Паркер ва Фабио Уордли ўртасидаги вақтинчалик WBO чемпионлик жанги ғолиби билан жанг қилишга рози бўлди. Аммо 25 октябрь куни Уордли Паркерни мағлуб этганида, Усик жангдан ҳам, WBO камаридан ҳам воз кечди.

Британиялик 30 ёшли Уордли сўнгги дақиқаларгача Усикнинг фикридан қайтишига умид қилганди. Аммо энди унинг промоутери Фрэнк Уоррен Усик билан кейинги жанг санаси ва рақиби ҳақида гаплашмоқчи.

"Паркернинг жанги олдидан Усик ғолиб билан тўқнаш келишини айтди, аммо кейин фикридан қайтди. Кўриниб турибдики, у таваккал мукофотга арзимайди, деб ўйлайди", - дея Уорреннинг сўзларини келтиради talkSPORT. - Ўйлашимча, биз бу жанг учун футбол стадионини сотган бўлардик, уни "Тоттенҳем" стадионида ўтказишимиз мумкин эди.

"Фабио апрель ойида рингга қайтади. Мен у ва унинг менежери билан келаси ҳафта учрашаман. Тушлик қилиб, кейин нима қилишимизни ҳал этамиз. Кўплаб вариантлар бор" - дея қўшимча қилди промоутер.

WBO чемпионлиги учун эҳтимолий даъвогарлар рейтингнинг иккинчи ва учинчи рақамли боксчилари Филип Хргович ва Чжан Чжилей ҳисобланади. Аммо янги жаҳон чемпионини британиялик икки собиқ жаҳон чемпионлари Даниэль Дюбуа ва Энтони Жошуа кўпроқ қизиқтириши мумкин.