Ярим финалга етиб келган Ҳуррамов ва Олтибоев бронза учун курашади

Қитъа чемпионатининг сўнгги куни эркаклар -90, -100, +100 кг, аёллар эса -78 ҳамда +78 кг вазн тоифаларида мусобақа медаллари ҳамда Токио-2020 Олимпиадасига муҳим рейтинг очколари учун татамига чиқишяпти. 

Хабар берганимиздек, бугунги баҳсларда ўзбекистонлик дзюдочилардан 5 нафари ҳам ўз маҳоратини намойиш қилмоқда. 

-100 кг вазн тоифасидаги полвонимиз Муҳаммадкарим Хуррамов Хитой Тайпейи вакили Жи Гуан Лу, австралиялик Кайхан Такаги-Ўзчичекни мағлуб этиб, ярим финалга йўл олди. Аммо, финал остонасида кореялик Жонг Хун Вонга имкониятни бой бериб қўйди. Бироздан сўнг у бронза медали учун баҳсда покистонлик Шах Ҳусайн Шахга қарши татамига чиқади. 

+100 кг вазнда юртимиз шарафини ҳимоя қилаётган Бекмурод Олтибоев ҳам ярим финалда тўхтатилди. Бекмурод баҳрайнлик Азамат Чотчаев, қирғизистонлик Бекболот Токтогоновни таслим этди. Ярим финалда эса кореялик Санг Мин Кимга ютқазиб қўйди. Энди у бронза медали учун яна бир кореялик дзюдочи Мин Жонг Кимга қарши баҳс олиб боради.