Ёш боксчиларимиз Мўғулистонда: аккредитация, адаптация ва енгил машғулот + ФОТО

Терма жамоамиз аъзолари бугун маҳаллий вақт билан соат 06:15 да Чингизхон номидаги Улан-Батор халқаро аэропортига етиб боришди. Виза масаласи ҳал қилингандан сўнг, у ерда вакилларимизни ташкилий қўмита томонидан бириктирилган "волонтёрлар" кутиб олишди. Улан-Баторда аҳолининг асосий қисми рус тилида ҳам мулоқот қила олар экан.

Баҳсларга 10 ноябрь куни старт берилади. Унгача мураббий Ҳамид Тангрибергенов бошчилигидаги чарм қўлқоп усталаримиз тайёргарликнинг сўнгги босқичини олиб боришади. 

Терма жамоамиз аъзолари Улан-Батордаги "Bayangol" меҳмонхонасига жойлашишди. Узоқ парвоздан сўнг вакилларимиз дам олишди. Тушликдан сўнг  эса Осиё чемпионати ташкилотчилари боксчи ва мураббийларимизни аккредитация учун суратга олишди. Кечга яқин боксчиларимиз енгил машғулотлар олиб боришади. Умуман олганда вакилларимиз ҳозирча адаптация жараёнини ўтказишмоқда. Қайд этиш лозимки, Улан-Батор фақатгина бир жиҳат бўйича Тошкентдан олдинда. У ҳам бўлса соат. Ўзбекистон ва Мўғулистон пойтахтлари ўртасидаги вақт тафовути уч соатни ташкил этади. 

Чингизхон номидаги халқаро аэропорт

Терма жамоамиз аъзолари жойлашган "Bayangol" меҳмонхонаси, "L" белгиси "таъмирда")

Ташкилотчилар аккредитация жараёнини бошлаб юборишган

Йигитларимиз ўз вазнларини ўлчаб кўришмоқда

Энг асосийси боксчиларимизнинг кайфияти аъло даражада. Умид қиламизки, мусобақадан сўнг ҳам мана шу кайфият ўзгармайди.

Сайтимиз ходими имкон даражасида мусобақадан эксклюзив янгиликларни етказиб туради. Фурсатдан фойдаланиб, мазкур сафарни ташкил этишда амалий ёрдам кўрсатган Ўзбекистон бокс федерациясига миннатдорчилик билдирамиз.