Ёш дзюдочиларимиз Питердаги нуфузли мусобақадан медаллар билан қайтишяпти

Россия Федерациясида хизмат кўрсатган мураббий Анатолий Рахлин хотирасига бағишлаб ўтказилган ушбу анъанавий мусобақа бундан бир неча дақиқа аввал якунига етди. 

Турнир 2005-2007 йилларда таваллуд топган ўсмир ва қизлар ўртасида ўтказилиб, унда Ўлмас Гуллиев, Рустам Фарҳодов ва Тоҳир Файзиев мураббийлигидаги ўзбекистонлик ёш дзюдочилар ҳам ўз маҳоратларини намойиш этишди. 

Питердаги "Юбилейный" спорт саройи мезбонлик қилган мусобақада ўғил болалар -35, -38, -42, -46, -50, -55, -60, -66, +66 кг., қизлар эса -37, -40, -44, -48, -52, -57 ҳамда +57 кг. вазн тоифаларида татамига чиқишди.   

Қувонарлиси, ҳамюртларимиздан икки нафари совриндорлар сафидан жой олди. -35 кг вазн тоифасида татамига чиққан Зафарбек Ўктамов ҳамда -38 кг вазндаги вакилимиз Иноятулло Телмонов финалга қадар мағлубиятсиз етиб бориб, кумуш медалга сазовор бўлишди.