Ёш эркин курашчимиз спорт Оскари - “Олтин мангуст” мукофотига лойиқ кўрилди

“Олтин мангуст” спортдаги “Оскар” соврини бўлиб, спортда катта ютуқларга эришаётган дунёнинг энг кучли ва совриндор атлетларига топширилади. Куни кеча Украинанинг Одесса шаҳрида бу йилги ғолибларга ушбу мукофотни тантанали топшириш маросими бўлиб ўтди.

Маросимда иштирок этган ёш эркин курашчимиз ўзига аталган совринни қабул қилиб олди. “Олтин мангуст” соврини нафақат спортчилар, балки спорт ривожига ҳисса қўшиб келаётган фахрийлар, спортга сармоя киритаётган ҳомийлар ва тадбиркорлар ҳамда сиёсатчиларга топширилади. 

Маълумот учун, Умиджон Жалоловгача Ўзбекистон спорт курашлари ассоциацияси раиси ўринбосари Шомурод Шофайзиев, эркин кураш бўйича икки карра Осиё ўйинлари ғолиби Бекзод Абдураҳмонов ҳамда бокс бўйича Рио Олимпиадаси чемпиони Ҳасанбой Дўсматовлар ҳам “Олтин мангуст” соврини билан тақдирланишган эди.