Ёш қиличбозларимиз Россиядаги турнирнинг жамоавий баҳсларида ғолиб бўлишди

Мусобақада 28 та жамоа (Россиядан 26 та, Ўзбекистон ва Қозоғистон терма жамоалари) иштирок этди. Сабля бўйича яккалик баҳсларида Шерзод Мамутов бронза медалига сазовор бўлди. Жамоавий беллашувларда эса йигитларимиз олтин медалга эга чиқишди. 

Ўсмирларимиз 1/8 финалдан ўз иштирокларини бошлашди. Ушбу босқичда Новосибирскнинг «Виктория» жамоаси 45:26 ҳисобида мағлуб этилди. Чорак финалда эса «Санкт-Петербург» жамоаси 33:45 ҳисобида мағлубиятини тан олди. 

Ярим финалда Новосибирскнинг «Спартак» жамоасидан 45:31 ҳисобида устун келган йигитларимиз ҳал қилувчи беллашувда Москванинг ЦСКА клуби қиличбозларига қарши кураш олиб боришди. Қизғин кечган баҳсда вакилларимиз 45:41 ҳисобида ғалаба қозониб, мусобақа ғолибига айландилар.

Маълумот учун, мусобақада юртимиз шарафини Жалолиддин Душамбоев, Пазилбек Генжебаев, Шерзод Мамутов, Бобур Расулов ҳимоя қилди. Қизларимиз эса битта ғалаба ва битта мағлубият билан мусобақани якунлашди.