Ёш шахматчиларимиз Ўзбекистон чемпионатида қанча пул ишлаб олишди?

Тажрибали гроссмейстерларни ортда қолдиришга муваффақ бўлган 16 ёшли шахматчи Нодирбек Ёқуббоев 13 имкониятдан 9,5 очко жамғариб, Ўзбекистон чемпионига айланди. Нодирбек 2016 йилда ҳам мамлакат чемпиони бўлган эди. 

Йигирма олти ёшга тўлган Никита Хорошев 9 очко билан кумуш, 13 ёшли Жавоҳир Синдаров 8,5 очко билан бронза медалига сазовор бўлди. Ўзбекистон шахмат федерацияси ғолиб ҳамда совриндорларга медал ва дипломдан ташқари пул мукофотларини ҳам тақдим этди. 

Жумладан, Ўзбекистон чемпионлигига эришган Нодирбек Ёқуббоев 8 миллион сумга эга бўлди. Кумуш медал соҳиби Никита Хорошев 4 миллион, бронза медали совриндори Жавоҳир Синдаров ҳам 4 миллион сўмлик чекни қўлга киритди. 

Тўртинчи ўринни банд этган тажрибали гроссмейстер Марат Жумаев 2 миллион сўм, 5-7 поғоналардан жой олган Нодирбек Абдусатторов, Тоҳир Воҳидов, Саидакбар Сайдалиев ўз ҳамёнларини 1 миллион сўмга бойитиб олишди.